Il-Ħalfa tad-Destin – Michael Cini

Qed nara dan is-sit tiegħi li qiegħed hemm biex nerfa’ l-kitbiet li kultant tispirani l-muża u ndunajt li kont ili aktar minn sena ma nippubblika xi ħaġa. Lanqas kelli bżonn minuti twal ta’ riflessjoni, kont naf ir-raġuni x’inhi. Il-konċentrazzjoni u s-saħħa mentali kienu mitfugħin fuq ħwejjeġ ferm aktar importanti mill-kitba li tant inħobb.

Illum moħħi aktar mistrieħ, erħila li l-mewġ tal-problemi dejjem iħabbat mas-swar ta’ ħsibijieti iżda llum għandi aptit nikteb u qed nirrikorri għal metodu li kienu għallmuni meta kont ċkejken.

Dari, kont immur il-privat tal-Ingliż fir-raħal stess. Tefa’ ta’ ġebla ‘l bogħod u mnalla għax jien kont nieħu pjaċir inġorr kull folja, ktieb, lapes u kull ma kellu x’jaqsam mas-suġġett. Dan biex ma nsemmux iċ-ċanfir ta’ ommi u tas-surmast li kont nitgħabba biżżejjed; bħalliqallu mhux persunaġġi bħalu li derrewna nitgħabbew b’ħafna kotba biex umbagħad flok niftħuhom nużaw xi handout!

Insomma, żvijajt. Mela, din tal-privat, u minn hawnhekk niżżiha ħajr kbir li għallmitni kif għandi nistudja l-lingwi sew, kull ġimgħa kienet tagħtini ktieb x’naqra u nikteb dwaru. Ta’ tfajjel li kont niftakarni nkun mistagħġeb kif din taf il-kontenut ta’ kull ktieb li qatt tagħtni x’naqra. Illum naf li kulma hi kienet tagħmel kien li tikkoerġi l-komponiment li jien inkun sfurnajt wara l-qari ta’ dak il-ktieb. B’hekk kienet tolqot mhux tnejn imma mill-inqas tliet għasafar b’dak il-ktieb, għallinqas mhux rasi!

Grazzi għal dal-metodu jiena kont qed nitħarreġ fil-lingwa billi naqra proża miktuba sew, naħseb u finalment nikteb komponiment u nżomm lili nnifsi dejjem attiv fil-lingwa minħabba li kont qiegħed inkun espost għaliha kważi kuljum minħabba l-qari. Jien għadni nagħmel nħaddan dal-metodu sal-lum għal kwalunkwe suġġett li jfettili nistudja. Grazzi, Miss!

U nistħajjilkom tgħiduli, “eżattament meta se jibda diskorsok dwar Il-Ħalfa tad-Destin?” Għandkom raġun, sejħulu lapsus.

Għamilt xhur sħaħ naqra artikli bl-Ingliż u bil-Malti mingħajr ma naqra rumanzi. U minn dawn tal-aħħar sirt inħobb naqra biss bil-Malti sakemm ma jkunx xi volum interessanti bħal House of Leaves li nissuġġerih lin-nies mingħajr ma jien stess għaddejtu minn taħt l-iskrutinju tiegħi. Dak għax infurmat biżżejjed dwaru.

Allura saqsejt lil xi qraba għal kotba bil-Malti li qraw u li setgħu jsellfuni qabel ngħaddi sal-librerija u ngħatali dal-ktieb. Bdejtu u fi ftit ġimgħat ħrattu. Mhux volum kbir iżda mhux dejjem kelli moħħi hemm biex nintefa’ kwiet naqra.

Li saħħarni kien il-kliem maestuż li l-awtur żewwaq il-proża tiegħu. Ara jien fejn qatt rajt il-kelma ħâra li kelli naqra darbtejn tlieta s-silta minħabba li kont għoddni kkonfondejt dwar x’għandu x’jaqsam il-prodott tal-għemil fil-kamra l-baxxa mal-mawra sigrieta li xi suldati kienu qed isegwu fis-satra tal-lejl! U bħala, anke jekk mingħajr dik il-â, hemm biżibilju ta’ kliem mhux daqstant modern. Li naf fiċ-ċert huwa li jaf influwenza l-istil prożajk tiegħu minn awturi Maltin antiki, bħal Emilio Lombardi li dan tal-aħħar u l-ġenerazzjonijiet ta’ warajh iħobbu jużaw il-kelma infami. Din hija konġettura sa ma nisma’ lill-awtur ilissinha hu stess.

Hekk li ddiskutejna l-kliem rikk li juża, issa ngħaddi għad-deskrizzjonijiet ħajjin tal-battalji tal-Assedju l-Kbir u t-tbiċċir diżuman li t-Torok kienu jwettqu b’tant ħdura u pjaċir u għall-iljieli sħan sforz il-fjur tan-namur taż-żgħożija.

Jien u nirrevedi xi ktibt sa issa nirrealiżża li iktar ktibt dwar ir-raġuni li kont ili ma nippubblika artiklu milli dwar il-ktieb innifsu. Iżda minix daqstant imdejjaq għax dan l-eżerċizzju huwa manifest tax-xewqa li nikteb xi ħaġa wara tant xhur.

Tal-aħħar! Rumanz rakkomandat u ktieb li għad nerġa’ naqrah biex nieħu noti dettaljati tal-kliem li qatt ma smajt qabel u li kelli nagħsar it-tifsira tagħhom mill-kuntest tal-paragrafu (jew mid-dizzjunarju!).