Dik it-tikka f'nofs il-baħar

Sit partikolari iddeskriva ċerta oġġett bħala tikki kaħlana f’baħar ta’ linka sewda. Din is-sentenza, forsi għax hija traduzzjoni kemxejn litterali, ma tgħid xejn u tispjega tantieħor. Iżda meta fil-kuntest nimmaġinaw pjaneta allura dik is-sentenza tieħu xejra differenti u veritiera. Wara kollox l-ispazju huwa baħar enormi li l-ilma tiegħu huwa l-iswed tal-vojt li hu msemmi għalih.

Dan il-pjaneta li hu ferm il-bogħod mid-dinja jidher bħala sfera blu u meta kien tfaċċa quddiem it-teleskopji x-xjentisti kienu qabblu dan il-kulur mal-oċejani tagħna. Wara aktar studju x-xjentisti ħarġu ferm diżappuntati għax dak il-blu huwa sħab velenuż mimli silikat.

Biex dan il-pjaneta jkompli juri kemm ma jixtieqx ħolqien fuq wiċċu, hu huwa maħkum minn irjieħ li jaqbżu l-veloċità tal-ħoss b’seba’ darbiet. Li kellu jinqabad bniedem f’nofs riħ minn dawn xejn ma jibqa’ minnu għax hu mifhum ukoll li x-xita ssegwi d-direzzjoni tar-riħ u ma tinżilx if nafuha aħna, mis-sema l-isfel. 

Għall-kuntrarju ta’ li jiġri fid-dinja x-xita tinżel, jekk tista’ tibqa tissejjaħ hekk, b’mod oriżżontali. Biex nispjegaw aħjar il-kunċett, kieku kellna nwaddbu ballun għal isfel dan ma jaqax iżda jinqabad fir-riħ u jivvjaġġa skond id-direzzjoni tiegħu. 

U dan għadu mhu’xejn. L-aħħar fatt li għandi għalikom huwa li x-xita hija ta’ ħġieġ imdewweb u mhux ilma. 

Tistgħu timmaġinaw ix-xita li flok ixxarbek u ġġibek għasra tagħmillek ħsara kbira irreparabbli?

Naraw x’nagħmlu u lejn dan il-pjaneta ma nersqux!

Min irid jitkixxef iktar dwar dan il-pjaneta għandu jfittex “189733b”.